Универзитет „Гоце Делчев“ – Штип, Северна Македонија, преку Центарот за доживотно учење, објавува Повик за учество на обука во програма за микроквалификација на тема „Управување и надзор во безбедносниот сектор“.
Програмата е конципирана и структурирана како интердисциплинарна, десетдневна обука која има за цел да обезбеди продлабочено разбирање на демократското управување, реформата и надзорот на разузнавачко-безбедносниот сектор, во согласност со принципите на владеење на правото, човековите права и транспарентноста.
Програмата е во согласност со Препораката на Советот на ЕУ од 16 јуни 2022 година за европски пристап кон микрокреденцијали (2022/C 243/02). Оваа програмата е развиена со поддршка на ДЦАФ-Женевскиот центар за управување со безбедносниот сектор и во соработка со Универзитетот „Гоце Делчев“ – Штип, претставници на граѓанскиот сектор и медиумите, со цел да одговори на реалните потреби за зајакнување на демократскиот надзор и јавната отчетност во безбедносниот сектор. Оваа активност е дел од Програмата за реформи на разузнавачкиот и безбедносниот сектор во Република Северна Македонија (2021-2026) имплементирана од ДЦАФ и поддржана од Швајцарија, Шведска и од Холандија.
Цел на програмата
Програмата има за цел да ги зајакне знаењата и практичните вештини на учесниците за:
- разбирање на структурата и функционирањето на безбедносниот сектор;
- анализа на безбедносните политики и законодавство;
- следење и известување за реформските процеси;
- активно учество во демократскиот граѓански надзор и јавниот дискурс.
Кој може да аплицира?
Повикот е наменет за:
- претставници на граѓански организации;
- новинари и медиумски работници (вклучително и млади и аспиративни новинари);
- истражувачи и претставници на тинк тенк организации;
- студенти од прв, втор и трет циклус на студии на новинарство.
Што опфаќа програмата?
Програмата е структурирана во релевантни тематски модули, меѓу кои:
- безбедносен сектор и реформски процеси;
- демократски надзор и улогата на граѓанското општество и медиумите;
- човекови права и национална безбедност;
- приватност и заштита на лични податоци;
- родова перспектива и агендата „Жени, мир и безбедност“;
- интегритет и антикорупција;
- сајбер-безбедност и дигитална трансформација;
- пристапите на НАТО и ЕУ во реформата на безбедносниот сектор;
- постлегислативна контрола на безбедносни закони и политики.
Пристап на учење
Наставата се реализира преку:
- интерактивни предавања;
- студии на случај;
- практични вежби и симулации;
- работа во групи и дискусии.
Програмата ќе се реализира од страна на професори од Универзитет „Гоце Делчев“ – Штип, како и експерти од практиката, вклучително и етаблирани новинари и претставници на граѓански организации.
Програмата комбинира теоретско знаење со практична примена, со фокус на развој на аналитички, истражувачки и комуникациски вештини.
Сертификација
- По успешно завршување, учесниците ќе добијат сертификат од Универзитетот „Гоце Делчев“ – Штип.
Јазик на реализација
- Македонски јазик.
Времетраење на програмата
- Програмата ќе започне на 16.9.2026 година и ќе се реализира еднаш неделно, во периодот од 16.9.2026 година до 18.11.2026 година.
Видео: https://www.youtube.com/watch?v=KYJkPFYVvZA
Локација
- Тренинг центар на Правен факултет, Универзитет „Гоце Делчев“ – Штип.
Котизација
- Оваа пилот-програма ќе се реализира без финансиски надомест од учесниците.
________________________________________
Начин на аплицирање
Заинтересираните кандидати треба да достават кратка биографија (CV) на следнава е-адреса: cdu@ugd.edu.mk, заедно со пријава што ја има во прилог на овој Повик.
Пријава за учество на обука на тема Управување и надзор во безбедносен сектор Септември 2026 ЦДУУГД
Краен рок за аплицирање: 15 септември 2026 година.
