![](/images/2022/04/20-eu-web/1.jpg)
-
Создадено: Среда, 20 Април 2022
На 31 март и 1 април 2022 г., на Универзитетот во Салерно (Италија), се одржа вториот блок на конференциски предавања во рамките на третото издание на Жан Моне модулот за соработка помеѓу Европската унија и земјите од Западен Балкан во делот на правда и внатрешни работи (EUWEB), во раководство на професорката Тереза Русо (Teresa Russo), во кој учествува Правниот факултет како партнер институција.
На конференцијата се дискутираше за европските „граници“ и за предизвиците во делот на азилот и управувањето со миграциите во земјите од Западен Балкан, за предизвиците во процесот на апроксимација со правото на Европската унија, за азилот и меѓународната заштита, како и за нелегалната миграција и виктимизацијата на мигрантите и барателите на азил.
Од Правниот факултет земаа учество: проф. Ана Никодиновска Крстевска која говореше за Предизвиците и недостатоците во македонскиот пристап за борба против нелегалната миграција и криумчарењето на мигранти; проф. Олга Кошевалиска зборуваше за Виктимизација на мигрантите во дигиталниот свет; и доц. Елена Максимова презентираше за Препознавање на потенцијални жртви на трговија со луѓе меѓу мигрантите во Република Северна Македонија.
На конференцијата земаа учество еминенти професори, експерти и истражувачи од Италија и од други земји меѓу кои: Џузепе Морџеzе (Giuseppe Morgese) од Универзитетот „Алдо Моро“ во Бари; Енио Триџани (Ennio Triggiani), емеритус професор на Универзитетот „Алдо Моро“ во Бари; Франческо Керубини (Francesco Cherubini) од Универзитетот ЛУИС „Гвидо Карли“ од Рим; Фабио Спиталери (Fabio Spitaleri) од Универзитетот во Трст; Моника Масари (Monica Massari) од Универзитетот во Милано; Дарио Белучо (Dario Belluccio) од Associazione di studi giuridici sull’immigrazione – ASGI); Франческа Јерволино (Francesca Iervolinо), судија во специјализираната секција за „миграција и азил“ при Судот во Салерно и други.
Освен тоа, во рамките на посетата на Универзитетот на Салерно, се дискутираше за досегашната соработка помеѓу двата универзитети, како и за можностите за идна соработка. Дел од патувањата на конференцијата беа поддржани од фондот ЕРАЗМУС + проекти којшто го нуди Европската Комисија преку Универзитето „Гоце Делчев“ – Штип во рамките на Еразмус мобилност.